കൊച്ചി: തിരുവനന്തപുരം സ്വദേശിയെ കൂത്താട്ടുകുളത്തെ താമസസ്ഥലത്ത് മരിച്ചനിലയില്‍ കണ്ടെത്തി. കൂത്താട്ടുകുളത്തെ ഇറച്ചിക്കടയിലെ തൊഴിലാളിയായ രാധാകൃഷ്ണനെ(47)യാണ് താമസസ്ഥലത്ത് മരിച്ചനിലയില്‍ കണ്ടത്.
സംഭവം കൊലപാതകമാണെന്നാണ് പോലീസിന്റെ കണ്ടെത്തല്‍. സംഭവവുമായി ബന്ധപ്പെട്ട് രാധാകൃഷ്ണനൊപ്പം താമസിച്ചിരുന്ന തമിഴ്നാട് സ്വദേശിയെ പോലീസ് കസ്റ്റഡിയിലെടുത്തു. കൂത്താട്ടുകുളത്തുനിന്ന് കടന്ന ഇയാളെ തമിഴ്നാട്ടിലെ തെങ്കാശിയില്‍നിന്നാണ് കസ്റ്റഡിയിലെടുത്തത്.
രാധാകൃഷ്ണനും ഒപ്പംതാമസിക്കുന്ന തമിഴ്നാട് സ്വദേശിയും ഇറച്ചിക്കടയിലെ തൊഴിലാളികളാണ്. കഴിഞ്ഞദിവസം ശൗചാലയം ഉപയോഗിക്കുന്നതുമായി ബന്ധപ്പെട്ട് ഇരുവരും തമ്മില്‍ തര്‍ക്കമുണ്ടായതായാണ് വിവരം. ഇതിനുപിന്നാലെയാണ് രാധാകൃഷ്ണനെ മരിച്ചനിലയില്‍ കണ്ടെത്തിയത്.
രാധാകൃഷ്ണന്റെ തലയില്‍ ക്ഷതമേറ്റ പാടുകളുണ്ടായിരുന്നു. മാത്രമല്ല, മുറിയിലുണ്ടായിരുന്ന തമിഴ്നാട് സ്വദേശിയെ കാണാതായതും സംശയത്തിനിടയാക്കി. തുടര്‍ന്ന് പോലീസ് നടത്തിയ അന്വേഷണത്തില്‍ തമിഴ്നാട്ടിലെ തെങ്കാശിയില്‍നിന്നാണ് ഇയാളെ പിടികൂടിയത്.
