മുംബൈ: പാകിസ്ഥാന്‍ ആതിഥേയത്വം വഹിക്കുന്ന ഏഷ്യാ കപ്പില്‍ നിന്ന് ഇന്ത്യ പിന്മാറിയാല്‍ അടുത്ത വര്‍ഷം ഇന്ത്യയില്‍ നടക്കാനിരിക്കുന്ന ഏകദിന ലോകകപ്പില്‍ നിന്ന് പിന്മാറുമെന്ന പാക് ക്രിക്കറ്റ് ബോര്‍ഡിന്‍റെ തീരുമാനത്തില്‍ പ്രതികരണവുമായി കേന്ദ്ര കായിക മന്ത്രി അനുരാഗ് ഠാക്കൂര്‍.
ഇന്ത്യയോട് ആരും ഭീഷണി സ്വരത്തില്‍ സംസാരിക്കേണ്ടെന്നും അടുത്ത വര്‍ഷം ഇന്ത്യയില്‍ നടക്കുന്ന ഏകദിന ലോകകപ്പില്‍ പാകിസ്ഥാന്‍ ഉള്‍പ്പെടെയുള്ള എല്ലാ വലിയ ടീമുകളും കളിക്കുമെന്നും ഠാക്കൂര്‍ പറഞ്ഞു.
“ലോകകപ്പിന് യോഗ്യത നേടിയ എല്ലാ ടീമുകളെയും ഇന്ത്യയില്‍ കളിക്കാന്‍ ക്ഷണിക്കും. നിരവധി ലോകകപ്പുകള്‍ നമ്മള്‍ വിജയകരമായി നടത്തിയിട്ടുണ്ട്. പാകിസ്ഥാന്‍ മുമ്ബ് നിരവധി തവണ ഇന്ത്യയില്‍ കളിച്ചിട്ടുണ്ട്. ഇന്ത്യക്ക് ആരും നിര്‍ദ്ദേശങ്ങള്‍ നല്‍കേണ്ട ആവശ്യമില്ല. അത് കേള്‍ക്കാന്‍ ഞങ്ങള്‍ തയ്യാറല്ല.
എല്ലാ ടീമുകളും അടുത്ത വര്‍ഷം നടക്കുന്ന ഏകദിന ലോകകപ്പില്‍ പങ്കെടുക്കുമെന്ന് ഞങ്ങള്‍ കരുതുന്നു. കാരണം കായിക ലോകത്ത് ഇന്ത്യയെ അവഗണിച്ച്‌ മുന്നോട്ട് പോകാന്‍ കഴിയില്ല, പ്രത്യേകിച്ചും ക്രിക്കറ്റില്‍. അതിനാല്‍ തന്നെ അടുത്ത വര്‍ഷം ഏകദിന ലോകകപ്പ് ഇന്ത്യയില്‍ നടക്കും. അത് ഒരു ചരിത്ര സംഭവമാക്കി മാറ്റുകയും ചെയ്യും.” – അനുരാഗ് ഠാക്കൂര്‍ പറഞ്ഞു.
