ബംഗളൂരു:15 വിദ്യാര്‍ഥിനികള്‍ക്കുനേരെ ലൈംഗികാതിക്രമം നടത്തിയ കായികാധ്യാപകന്‍ അറസ്റ്റില്‍. സര്‍ക്കാര്‍ സ്കൂളിലെ 55കാരനാണ് അറസ്റ്റിലായത്.
എട്ട്, ഒമ്ബത് ക്ലാസുകളില്‍ പഠിക്കുന്ന കുട്ടികള്‍ക്കുനേരെ ഇയാള്‍ ലൈംഗികാതിക്രമം നടത്തിയെന്ന പ്രധാനാധ്യാപകന്‍റെ പരാതിയെത്തുടര്‍ന്നാണ് അറസ്റ്റ്. കായികപരിശീലനത്തിനിടെ സ്ഥിരമായി ലൈംഗികാതിക്രമം നടത്തുന്നുവെന്ന് വിദ്യാര്‍ഥിനികള്‍ രക്ഷിതാക്കളെ അറിയിക്കുകയായിരുന്നു. രക്ഷിതാക്കളാണ് പ്രധാനാധ്യാപകനോട് പരാതിപ്പെട്ടത്. പൊലീസില്‍ പരാതിനല്‍കിയതോടെ കായികാധ്യാപകന്‍ ഒളിവിലായിരുന്നു. മൊബൈല്‍ഫോണ്‍ കേന്ദ്രീകരിച്ച്‌ നടത്തിയ അന്വേഷണത്തിനൊടുവിലാണ് പിടിയിലായത്. പോക്‌സോ ഉള്‍പ്പെടെയുള്ള വകുപ്പുകള്‍ ഇയാള്‍ക്കെതിരെ ചുമത്തിയിട്ടുണ്ട്.
