ന്യൂഡല്ഹി: രാഹുല് ഗാന്ധി ഉദയ്പൂര് കൊലയാളികളെ പിന്തുണച്ചെന്ന വ്യാജ വാര്ത്ത റിപ്പോര്ട്ട് ചെയ്ത് സീ ന്യൂസ് മാപ്പ് പറഞ്ഞു.
ട്വിറ്ററിലൂടെയാണ് സീ ന്യൂസ് മാപ്പപേക്ഷയുമായി രംഗത്തെത്തിയത്. ഇന്നലെ ഡി.എന്.എ ഷോയില് രാഹുല് ഗാന്ധിയുടെ ഉദയ്പൂര് സംഭവവുമായി ബന്ധപ്പെടുത്തിയത് മനുഷ്യസഹചമായ പിഴവ് മാത്രമാണെന്ന് സീ ന്യൂസ് അവതാരകന് ട്വീറ്റ് ചെയ്തിരുന്നു.
അതേസമയം, കോണ്ഗ്രസ് നേതാവ് രാഹുല് ഗാന്ധിയെ ബന്ധപ്പടുത്തി വ്യാജ വിഡിയോ പ്രചരിപ്പിച്ച സീ ന്യൂസ് വാര്ത്ത അവതാരകനും, ബി.ജെ.പി ദേശീയ വക്താവ് രാജ്യവര്ധന് റാത്തോഡിനുമെതിരെ ജയ്പൂര് പൊലീസ് കേസെടുത്തിട്ടുണ്ട്. ശനിയാഴ്ച രാത്രിയാണ് ഇവര്ക്കെതിരെ പൊലീസ് എഫ്.ഐ.ആര് രജിസ്റ്റര് ചെയ്തത്.
വ്യക്തിയെ മനഃപൂര്വം അപമാനിക്കുക, ഭീഷണിപ്പെടുത്തുക, മതത്തിന്റെയും ജാതിയുടെയും അടിസ്ഥാനത്തില് വിവിധ വിഭാഗങ്ങള്ക്കിടയില് ശത്രുത വളര്ത്തുക എന്നിവ പ്രകാരം കോണ്ഗ്രസിന്റെ പ്രാദേശിക നേതാവ് രാം സിങ് ബാന്പാര്ക്ക് നല്കിയ പരാതിയിലാണ് കേസെടുത്തിരിക്കുന്നത്. രാജസ്ഥാന് മുഖ്യമന്ത്രി അശോക് ഗെഹ്ലോട്ട് ചാനലിനെ വിമര്ശിച്ച് മണിക്കൂറുകള്ക്ക് ശേഷമാണ് നടപടി.
രാഹുല് ഗാന്ധി കേരള സന്ദര്ശനത്തിനിടെ എസ്.എഫ്.ഐക്ക് നേരെ നടത്തിയ പ്രസ്താവന സീ ന്യൂസ് അവതാരകന് രോഹിത് രഞ്ജന് തന്റെ വാര്ത്ത പരിപാടിയില് ഉദയ്പൂര് കൊലപാതകത്തെ കുറിച്ചുള്ള രാഹുലിന്റെ പ്രസ്താവനയായി വരുത്തി തീര്ക്കാന് ശ്രമിച്ചെന്ന് പരാതിക്കാരന് ആരോപിച്ചു.