ചെന്നൈ; മുല്ലപ്പെരിയാറിലെ ആശങ്കയറിയിച്ചുള്ള പിണറായി വിജയന്റെ കത്തിന് തമിഴ്നാട് മുഖ്യമന്ത്രി സ്റ്റാലിന്റെ മറുപടി. മുല്ലപ്പെരിയാറിന്റെ കാര്യത്തില് ഒരു ആശങ്കയും വേണ്ട. ഡാമും ഡാമിലേക്കുള്ള വെള്ളത്തിന്റെ ഒഴുക്കും നിരീക്ഷിക്കുന്നുണ്ട്. നിലവില് വൃഷ്ടിപ്രദേശത്ത് അണക്കെട്ടിന്റെ താഴ്ഭാഗത്തുള്ളതിനേക്കാള് മഴ കുറവാണ്. വൈഗ അണക്കെട്ടിലേക്ക് അധികജലം കൊണ്ടുപോയി റൂള് കര്വ് പാലിക്കുന്നുണ്ട്. മുന്നറിയിപ്പില്ലാതെ അണക്കെട്ടു തുറന്നു ജലം ഒഴുക്കില്ലെന്നും എം.കെ.സ്റ്റാലിന് വ്യക്തമാക്കി.
അതിതീവ്രമഴ ലഭിക്കുന്ന സാഹചര്യത്തില് മുല്ലപ്പെരിയാറില് അടിയന്തര ഇടപെടല് വേണമെന്നാവശ്യപ്പെട്ട് ഈ മാസം അഞ്ചിനാണ് സ്റ്റാലിന് പിണറായി കത്ത് അയച്ചത്. അണക്കെട്ടിലെ ജലനിരപ്പ് കുറക്കുന്നതിന് വേണ്ടി തമിഴ്നാട് കൂടുതല് ജലം കൊണ്ടുപോകണമെന്നും, സ്വീകരിക്കുന്ന നടപടികള് 24 മണിക്കൂര് മുന്കൂട്ടി കേരളത്തെ അറിയിക്കണമെന്നും മുഖ്യമന്ത്രി കത്തില് ആവശ്യപ്പെട്ടിരുന്നു.