മുട്ടില് മരം മുറി കേസില് കുറ്റവാളികള്ക്ക് കനത്ത ശിക്ഷ ഉറപ്പാക്കുമെന്ന് വനം മന്ത്രി എകെ ശശീന്ദ്രൻ പ്രതികരിച്ചു.
മരം മുറിച്ചത് പട്ടയഭൂമിയില് നിന്ന് തന്നെയാണ് എന്നും വനഭൂമിയില് നിന്നാണ് മരം മുറിച്ചതെന്നത് മാധ്യമ സൃഷ്ടിയാണെന്നും മന്ത്രി വാര്ത്താസമ്മേളനത്തില് വ്യക്തമാക്കി.
മരം മുറിച്ചത് പട്ടയഭൂമിയില് നിന്ന് തന്നെയെന്ന് നേരത്തെ വ്യക്തമാക്കിയതാണ്. അന്വേഷണം ഫലപ്രദമാണ്. കുറ്റവാളികള്ക്ക് കനത്ത ശിക്ഷ ഉറപ്പാക്കും. വന നിയമം അനുസരിച്ച് ചെറിയ ശിക്ഷയെ ഉള്ളൂ. എന്നാല് കൂടുതല് ശിക്ഷ ഉറപ്പാക്കണം എന്നും മന്ത്രി പറഞ്ഞു.
എസ്ഐടിയും വനം വകുപ്പും സംയുക്തമായി അന്വേഷണം നടത്തുന്നു. കുറ്റകൃത്യം ബോധ്യപ്പെട്ടതിനാലാണ് കേസ് രജിസ്റ്റര് ചെയ്തത്. പ്രതികള് രക്ഷപ്പെടാൻ ശ്രമിക്കുക സ്വാഭാവികമാണ്. ഉത്തരവ് ദുര്വ്യാഖ്യാനം ചെയ്താണ് മരം മുറിച്ചത്. ഉത്തരവ് ദുര്വ്യാഖ്യാനം ചെയ്തതിന്റെ കുടുതല് തെളിവുകള് പുറത്ത് വരുന്നുണ്ട് എന്നും അദ്ദേഹം കൂട്ടിച്ചേര്ത്തു.