കോണ്ഗ്രസ് നേതാവ് രാഹുല് ഗാന്ധി നയിക്കുന്ന ‘ഭാരത് ജോഡോ യാത്ര’ക്ക് എല്ലാവരും പിന്തുണ നല്കണമെന്ന് സാമൂഹികപ്രവര്ത്തകനും സംവിധായകനുമായ ആനന്ദ് പട്വര്ദ്ധന്.
സമൂഹമാധ്യമങ്ങളിലൂടെയായിരുന്നു അദ്ദേഹത്തിന്റെ ആഹ്വാനം.
‘മോദിയുടെ ഉയര്ച്ചക്ക് കാരണമായി കോണ്ഗ്രസിനെ നമ്മളില് പലരും കുറ്റപ്പെടുത്തുന്നുണ്ട്. എന്നാല്, ഭാരത് ജോഡോ യാത്രക്ക് നമ്മളെല്ലാവരും ഉറപ്പായും പിന്തുണ നല്കണമെന്നാണ് ഞാന് കരുതുന്നത്’ -ആനന്ദ് പട്വര്ദ്ധന് പറഞ്ഞു.
ഭാരത് ജോഡോ യാത്രക്ക് പിന്തുണയുമായി കഴിഞ്ഞ ദിവസം സംവിധായകന് അടൂര് ഗോപാലകൃഷ്ണനും രംഗത്തെത്തിയിരുന്നു. യാത്ര നയിക്കുന്ന രാഹുല് ഗാന്ധിയെ കേരളാതിര്ത്തിയില് മുഖ്യമന്ത്രി പിണറായി വിജയന് സ്വീകരിക്കണമായിരുന്നുവെന്നും അടൂര് പറഞ്ഞിരുന്നു.
ഭാരത് ജോഡോ യാത്ര ഇന്ന് കേരളത്തില് പ്രവേശിച്ചിരിക്കുകയാണ്. കെ.പി.സി.സിയുടെ നേതൃത്വത്തില് പാറശ്ശാലയില് രാഹുല് ഗാന്ധിയെയും പദയാത്രികരെയും സ്വീകരിച്ചു.