ബിഹാറിലെ ഔറംഗാബാദില്‍ അഞ്ച് പേര്‍ നദിയില്‍ മുങ്ങി മരിച്ചു. 40കാരനും നാല് കൗമാരക്കാരായ പെണ്‍കുട്ടികളുമാണ് മുങ്ങി മരിച്ചത്.
ഹമിദ്നഗര്‍ ഗ്രാമത്തില്‍ ഞായറാഴ്ചയാണ് സംഭവം. 13 വയസിനും 15നും ഇടയിലുള്ള നാല് പെണ്‍കുട്ടികള്‍ തുണി കഴുകുന്നതിനായി പുന്‍പുന്‍ നദിയിലേക്ക് വന്നതായിരുന്നു.
അതിനിടെ പെണ്‍കുട്ടികളിലൊരാള്‍ നദിയിലെ ഒഴുക്കില്‍പെട്ടു. മറ്റ് മൂന്നുപേര്‍ പെണ്‍കുട്ടിയെ രക്ഷിക്കാന്‍ ശ്രമിച്ചു. എന്നാല്‍ അവര്‍ക്ക് രക്ഷിക്കാനായില്ലെന്ന് മാത്രമല്ല, അവരും ഒഴുക്കില്‍ പെട്ടു. ഇത് കണ്ട ഒരാള്‍ ഇവരെ രക്ഷിക്കുന്നതിനായി നദിയിലേക്ക് ചാടുകയായിരുന്നു. എന്നാല്‍ ഒഴുക്കില്‍പ്പെട്ട കുട്ടികള്‍ എല്ലാവരും ഭയപ്പെട്ട് ഇദ്ദേഹത്തെ മുറുക്കെ പിടിക്കാന്‍ ശ്രമിച്ചു. അതോടെ അഞ്ചുപേരും മുങ്ങിപ്പോവുകയായിരുന്നെന്ന് ദൗദ്നഗര്‍ സബ് ഡിവിഷണല്‍ മജിസ്ട്രറ്റ് അനുപം സിങ് പറഞ്ഞു.
