ലഖ്‌നൗ : പ്രയാഗ് രാജില്‍ വെല്‍ഫെയര്‍ പാര്‍ട്ടി നേതാവ് ജാവേദ് മുഹമ്മദിന്റെ വീട് തകര്‍ത്ത കേസില്‍ യു.പി സര്‍ക്കാറിന്റെ വിശദീകരണം തേടി അലഹാബാദ് ഹൈകോടതി.
ജാവേദ് മുഹമ്മദിന്റെ ഭാര്യ ഫാത്തിമ നല്‍കിയ ഹരജിയിലാണ് ജസ്റ്റിസുമാരായ അഞ്ജനി കുമാര്‍ മിശ്ര, സയ്ദ് വായ്‌സ് മിയാന്‍ എന്നിവരടങ്ങിയ ബെഞ്ച് സര്‍ക്കാറിന്റെയും പ്രയാഗ് രാജ് വികസന അതോറിറ്റിയുടെയും വിശദീകരണം തേടിയത്. ബുധനാഴ്ച വിശദീകരണം നല്‍കണം. കേസില്‍ വ്യാഴാഴ്ച വാദംകേള്‍ക്കല്‍ തുടരും.
കേസ് ആദ്യം പരിഗണിച്ചിരുന്ന ജസ്റ്റിസ് സുനിത അഗര്‍വാള്‍ നേരത്തെ വാദം കേള്‍ക്കുന്നതില്‍നിന്ന് പിന്‍വാങ്ങിയിരുന്നു. ഇതേ തുടര്‍ന്നാണ് മറ്റൊരു ബെഞ്ചിന്റെ പരിഗണനക്ക് വിട്ടത്. തകര്‍ത്ത വീട് തന്റെ പേരിലായിരുന്നുവെന്നും പിതാവ് ദാനമായി നല്‍കിയതായിരുന്നുവെന്നും ഫാത്തിമ പരാതിയില്‍ പറഞ്ഞിരുന്നു. എല്ലാ രേഖകളും തന്റെ പക്കലുണ്ടായിട്ടും നോട്ടീസ് പോലും നല്‍കാതെയാണ് വീട് തകര്‍ത്തതെന്നും അവര്‍ കുറ്റപ്പെടുത്തി.
ആക്ടിവിസ്റ്റ് അഫ്രീന്‍ ഫാത്തിമയുടെ പിതാവും വെല്‍ഫെയര്‍ പാര്‍ട്ടി നേതാവുമായ ജാവേദ് മുഹമ്മദിന്റെ വീട് ജൂണ്‍ 12നാണ് പ്രയാഗ് രാജ് പ്രാദേശിക ഭരണകൂടം തകര്‍ത്തത്.
