പറവൂര്‍: പോലീസിനുനേരെ ആക്രമണം നടത്തിയ മദ്യപസംഘത്തിലെ നാലുപേര്‍ പിടിയില്‍. തുരുത്തിപ്പുറം സ്വദേശി ബിജു (50), ഓണത്തുകാട് സ്വദേശി ശാന്തിലാല്‍ (36), കൂട്ടുകാട് സ്വദേശി സ്മിത്ത് (36), പരുവത്തുരുത്ത് സ്വദേശി സെബാസ്റ്റ്യന്‍ (33) എന്നിവരെയാണ് റിമാന്‍ഡ് ചെയ്തത്.
ഓണത്തുകാട് ഭാഗത്ത് നിര്‍ദിഷ്ട ദേശീയപാതക്കായി ഏറ്റെടുത്ത സ്ഥലത്ത് ഇവര്‍ സ്ഥിരമായി മദ്യപാനത്തിനും ലഹരി ഉപയോഗത്തിനുമായി ഒത്തുചേരാറുണ്ട്.
കഴിഞ്ഞ ദിവസം മദ്യപിച്ചെത്തിയ സംഘം സ്ത്രീകളെയും കുട്ടികളെയും ശല്യംചെയ്യുന്നതായി വിവരം ലഭിച്ചതിന്റെ അടിസ്ഥാനത്തില്‍ വടക്കേക്കര പോലീസ് സ്ഥലത്തെത്തി. പിടികൂടാന്‍ ശ്രമിക്കുന്നതിനിടെ ഇവര്‍ ഉദ്യോഗസ്ഥര്‍ക്കെതിരെ തിരിയുകയും ആക്രമിക്കുകയുമായിരുന്നു. വേലിപത്തല്‍ വടികൊണ്ടുള്ള അടിയില്‍ പോലീസ് ഉദ്യോഗസ്ഥന്റെ തലക്ക് പരിക്കേറ്റിട്ടുണ്ട്.
തുടര്‍ന്ന് പോലീസ് ബലമായി ഇവരെ ജീപ്പില്‍കയറ്റി സ്റ്റേഷനിലേക്ക് കൊണ്ടുപോവുകയായിരുന്നു. ഇന്‍സ്പെക്ടര്‍ വി.സി. സൂരജ്, ഉദ്യോഗസ്ഥരായ എം.എസ്. ഷെറി, റസാഖ്, ബേബി കൃഷ്ണകുമാര്‍, മിറാഷ്, പ്രവീണ്‍ ദാസ്, സിജിമോന്‍ എന്നിവര്‍ ചേര്‍ന്നാണ് പ്രതികളെ അറസ്റ്റ് ചെയ്തത്.
