തിരുവനന്തപുരം: പൊതുമേഖലാ സ്ഥാപനങ്ങളിലെ പെന്‍ഷന്‍ പ്രായം വര്‍ധിപ്പിച്ചതിലുള്ള വിയോജിപ്പ് പ്രകടിപ്പിച്ച്‌ ഡി.വൈ.എഫ്.ഐ.
പെന്‍ഷന്‍ പ്രായം 60 ആക്കി ഉയര്‍ത്തിയത് അംഗീകരിക്കാനാവില്ലെന്ന് ഡി.വൈ.എഫ്.ഐ സംസ്ഥാന സെക്രട്ടേറിയറ്റ് വ്യക്തമാക്കി. ഉത്തരവ് പിന്‍വലിക്കണമെന്നും സംഘടന സംസ്ഥാന സര്‍ക്കാരിനോട് ആവശ്യപ്പെട്ടു. അതേസമയം, സര്‍ക്കാരിന് യുവാക്കളോട് വിവേചനമില്ലെന്നും അനുഭാവപൂര്‍ണമായ സമീപനമാണുള്ളതെന്നും ഡി.വൈ.എഫ്.ഐ അഭിപ്രായപ്പെട്ടു.
കെ.എസ്.ഇ.ബി, കെ.എസ്.ആര്‍.ടി.സി, വാട്ടര്‍ അതോറിട്ടി എന്നിവ ഒഴികെയുള്ള പൊതുമേഖലാ സ്ഥാപനങ്ങളില്‍ പുതിയ ഉത്തരവ് ബാധകമാണ്. ഒരു ലക്ഷത്തിലധികം ജീവനക്കാര്‍ക്ക് ബാധകമായ ഈ ഉത്തരവ് തൊഴിലന്വേഷകരായ ലക്ഷക്കണക്കിന് ഉദ്യോഗാര്‍ത്ഥികളെ പ്രതികൂലമായി ബാധിക്കുമെന്നും ഡി.വൈ.എഫ്.ഐ പ്രസ്താവനയില്‍ പറഞ്ഞു.
പൊതുമേഖലാ സ്ഥാപനങ്ങളിലെ പെന്‍ഷന്‍ പ്രായം വര്‍ധിപ്പിച്ച ധനവകുപ്പിന്‍റെ ഉത്തരവ് പിന്‍വലിക്കണമെന്നാണ് ഡി.വൈ.എഫ്.ഐയുടെ ആവശ്യം. സേവന വേതന വ്യവസ്ഥകളുടെ ഏകീകരണത്തില്‍ എതിര്‍പ്പില്ല. എന്നാല്‍ പെന്‍ഷന്‍ പ്രായം 60 വയസ്സായി ഉയര്‍ത്തിയ തീരുമാനം പിന്‍വലിക്കണം. കേരളത്തിലെ ഉദ്യോഗാര്‍ഥികളെ പ്രതികൂലമായി ബാധിക്കുന്ന വിഷയമാണിതെന്നും ഡിവൈഎഫ്‌ഐ സെക്രട്ടറി വി കെ സനോജ് പറഞ്ഞു.
