ലക്നൗ : മൂന്ന് മാസം മുമ്ബ് ബലാത്സംഗം ചെയ്യപ്പെട്ട് ഗര്ഭിണിയായ പെണ്കുട്ടിയെ തീകൊളുത്തി ജീവനോടെ ചുട്ടുകൊന്നു. ഉത്തര്പ്രദേശിലെ മെയിന്പുരി ജില്ലയില് കുരവലി പൊലീസ് സ്റ്റേഷന് പരിധിയിലാണ് അതിക്രൂരമായ സംഭവം നടന്നത്. കൊലപാതകത്തില് മൂന്ന് പേര്ക്കെതിരെ പൊലീസ് കേസെ എടുത്തു.
മൂന്ന് മാസം മുമ്ബ് ഇതേ ഗ്രാമത്തില് താമസിക്കുന്ന അഭിഷേക് എന്നയാള് തന്റെ മകളെ ബലാത്സംഗം ചെയ്തതായി പെണ്കുട്ടിയുടെ അമ്മ ആരോപിച്ചു. എന്നാല് പെണ്കുട്ടി വീട്ടുകാരോട് പീഡിപ്പിക്കപ്പെട്ടുവെന്നത് വെളിപ്പെടുത്തിയില്ല. കടുത്ത വയറുവേദന അനുഭവപ്പെട്ടതിനെ തുടര്ന്ന് പെണ്കുട്ടിയെ പരിശോധനയ്ക്ക് വിധേയമാക്കിയപ്പോഴാണ് ഗര്ഭിണിയാണെന്ന് അറിയുകയും പഞ്ചായത്തിനെ അറിയിക്കുകയും ചെയ്തത്. ഒക്ടോബര് ആറിന് പഞ്ചായത്ത് യോഗത്തില് പെണ്കുട്ടിയും പ്രതിയും വിവാഹിതരാകാന് തീരുമാനമെടുത്തു.
തുടര്ന്ന് പ്രതിയുടെ അമ്മ പെണ്കുട്ടിയെ വീട്ടിലേക്ക് കൂട്ടിക്കൊണ്ടുപോയി പെട്രോള് ഒഴിച്ച് തീക്കൊളുത്തിയതായി പെണ്കുട്ടിയുടെ കുടുംബം ആരോപിച്ചു. ഗുരുതരമായി പൊള്ളലേറ്റ പെണ്കുട്ടിയെ മെയിന്പുരിയിലെ ജില്ലാ ആശുപത്രിയില് പ്രവേശിപ്പിക്കുകയും പിന്നീട് മറ്റൊരു ആശുപത്രിയിലേക്ക് മാറ്റുകയും ചെയ്തു.
പെണ്കുട്ടിയുടെ അമ്മയുടെ പരാതിയുടെ അടിസ്ഥാനത്തില് ഐപിസി 307, 376 വകുപ്പുകളും പോക്സോ നിയമത്തിലെ വകുപ്പുകളും പ്രകാരമാണ് പൊലീസ് കേസെടുത്തിരിക്കുന്നത്. സംഭവത്തിന് പിന്നാലെ ഒളിവില് പോയ പ്രതികള്ക്കായി തിരച്ചില് നടത്തി വരികയാണെന്നും അറസ്റ്റ് ഉടന് ഉണ്ടാകുമെന്നും പൊലീസ് അറിയിച്ചു.