മാവേലിക്കര: ചെട്ടികുളങ്ങര കേന്ദ്രീകരിച്ചു നടന്ന കോടികളുടെ നിയമനത്തട്ടിപ്പുമായി ബന്ധപ്പെട്ട് സ്പെഷ്യല് ബ്രാഞ്ച് എസ്.ഐയെ സസ്‌പെന്‍ഡ് ചെയ്‌തു.
മറ്റൊരു എസ്.ഐയെയും സ്പെഷ്യല് ബ്രാഞ്ച് ഉദ്യോഗസ്ഥനെയും സ്ഥലം മാറ്റി. ജില്ലാ പൊലീസ് മേധാവി സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തില്‍ എറണാകുളം റേഞ്ച് ഡി.ഐ.ജി നീരജ് കുമാര്‍ ഗുപ്തയാണ് നടപടിയെ‌ടുത്തത്.
എസ്.ഐ ആര്‍.ആനന്ദകുമാറിനാണ് സസ്പെന്ഷന്. മാവേലിക്കര എസ്.ഐ ആയിരുന്ന മൊഹ്‌സീന്‍ മുഹമ്മദിനെ എറണാകുളം റൂറലിലേക്കും സ്പെഷ്യല് ബ്രാഞ്ച് ഉദ്യോഗസ്ഥനായ ശിവപ്രസാദിനെ എറണാകുളത്തേക്കുമാണ് മാറ്റിയത്. നിയമന തട്ടിപ്പു കേസുമായി ബന്ധപ്പെട്ട് ഇതോടെ നാല് പൊലീസ് ഉദ്യോഗസ്ഥരാണ് സസ്‌പെന്‍ഷനിലായത്.
പ്രതികളുമായി അനാവശ്യ ബന്ധം സ്ഥാപിച്ചു, കേസിന്റെ വിവരങ്ങള്‍ പ്രതികള്‍ക്ക് ചോര്‍ത്തിക്കൊടുത്തു, വാദികളുടെ പരാതി പരിഹരിക്കാന്‍ ഇടനില നിന്നു, വിവരങ്ങള്‍ മേലധികാരികളെ അറിയിച്ചില്ല, മുഖ്യപ്രതി വിനീഷ് രാജിന്റെ പെറ്റ് ഷോപ്പില്‍ നിന്നു പട്ടിക്കുഞ്ഞുങ്ങളെയും പട്ടിക്കുള്ള ഭക്ഷണവും വാങ്ങി, ഇറച്ചിയും മീനും സൗജന്യമായി കൈപ്പറ്റി എന്നീ കുറ്റങ്ങളാണ് പൊലീസുകാര്‍ക്കെതിരെ ഉള്ളത്. വകുപ്പുതല അന്വേഷണ ചുമതല അമ്ബലപ്പുഴ ഡിവൈ.എസ്.പിക്കാണ്. ആരോപണം ഉയര്‍ന്നപ്പോള്‍ തന്നെ ആനന്ദകുമാറിനെ വള്ളികുന്നത്തേക്കും ശിവപ്രസാദിനെ ഹരിപ്പാട്ടേക്കും സ്ഥലം മാറ്റിയിരുന്നു.
കേസെടുക്കാതെ ഒത്തുതീര്‍പ്പാക്കിയതിനാണ് എസ്.ഐ മൊഹ്‌സീന്‍ മുഹമ്മദിനെ എറണാകുളം റൂറലിലേക്ക് മാറ്റിയത്. പ്രത്യേക സംഘത്തില്‍ നിന്നു നേരത്തെ ഇയാളെ ഒഴിവാക്കിയിരുന്നു.
