തിരുവനന്തപുരം: തിരുവനന്തപുരം കോര്‍പ്പറേഷന്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ സ്ഥാനം ഡി ആര്‍ അനില്‍ രാജിവച്ചു.
കരാര്‍ നിയമനത്തിനുള്ള പാര്‍ട്ടി പട്ടിക ആവശ്യപ്പെട്ട് സിപിഎം ജില്ലാ സെക്രട്ടറിക്ക് മേയറുടേയും ഡി ആര്‍ അനിലിന്‍റെയും ലെറ്റര്‍ പാഡില്‍ കത്ത് പുറത്തായതിന് പിന്നാലെ വ്യാപക പ്രതിഷേധം ഉയര്‍ന്നിരുന്നു.
കത്തെഴുതിയതായി അനില്‍ സമ്മതിച്ചിരുന്നു. മേയറുടെ പേരിലുള്ള കത്ത് വ്യാജമാണെന്നായിരുന്നു തുടക്കം മുതലുള്ള സി.പി.എമ്മിന്‍റെ നിലപാട്. ഇതിനിടെ വിജിലന്‍സും ക്രൈംബ്രാഞ്ചും അന്വേഷണം നടത്തി.
കത്തിന്‍റെ യഥാര്‍ത്ഥ പകര്‍പ്പോ ഉറവിടമോ ഇരു ഏജന്‍സികളും ഇതുവരെ കണ്ടെത്തിയിട്ടില്ല. മേയറുടെയും കോര്‍പ്പറേഷന്‍ ജീവനക്കാരുടെയും മൊഴി രേഖപ്പെടുത്തി. മേയറുടെ ഓഫീസിലെ അഞ്ച് കമ്ബ്യൂട്ടറുകളും ഡി.ആര്‍ അനിലിന്‍റെ മൊബൈല്‍ ഫോണും ഫോറന്‍സിക് പരിശോധനയ്ക്ക് ക്രൈംബ്രാഞ്ച് അയച്ചിട്ടുണ്ട്. നിയമനം നടക്കാത്തതിനാല്‍ സര്‍ക്കാരിന് ഒരു നഷ്ടവും ഉണ്ടായിട്ടില്ലെന്നും അതിനാല്‍ കേസ് അന്വേഷണ പരിധിയില്‍ വരില്ലെന്നും ആണ് വിജിലന്‍സിന്‍റെ പ്രാഥമിക റിപ്പോര്‍ട്ട്. നിലവിലെ അന്വേഷണം പ്രഹസനമാണെന്നാണ് പ്രതിപക്ഷത്തിന്‍്റെ നിലപാട്.
