ന്യൂഡല്‍ഹി: വാണിജ്യ അടിസ്ഥാനത്തില്‍ ജനിതകമാറ്റം വരുത്തിയ കടുക്(ഡിഎംഎച്ച്‌-11) പുറത്തിറക്കുന്നത് ഇന്ത്യയുടെ ഭക്ഷ്യ എണ്ണ ഇറക്കുമതി പ്രശ്നം പരിഹരിക്കുമെന്ന് ഉറപ്പില്ലെന്ന് ഇന്ത്യന്‍ കൗണ്‍സില്‍ ഓഫ് അഗ്രികള്‍ച്ചറല്‍ റിസര്‍ച്ച്‌ (ഐസിഎആര്‍).
ഭക്ഷ്യസുരക്ഷ ഉറപ്പാക്കുന്നതിനും ഇറക്കുമതിയെ ആശ്രയിക്കുന്നത് കുറയ്ക്കുന്നതിനുമായി ഇത്തരം വിളകള്‍ ഉല്‍പ്പാദിപ്പിക്കുന്നതിന് ഇന്ത്യ ശ്രമിക്കുന്നുണ്ട്.
തദ്ദേശീയമായി വികസിപ്പിച്ചെടുത്ത ജനിതകമാറ്റം വരുത്തിയ കടുക് വിത്തുകള്‍ക്ക് ഒക്ടോബറില്‍ പരിസ്ഥിതി മന്ത്രാലയം അംഗീകാരം നല്‍കിയിരുന്നു. രണ്ട് വര്‍ഷത്തിനുള്ളില്‍ രാജ്യത്തെ ആദ്യത്തെ ഭക്ഷ്യവിളയുടെ വാണിജ്യാടിസ്ഥാനത്തിലുള്ള വില്‍പ്പനയ്ക്ക് ഇത് വഴിയൊരുക്കും. നിലവില്‍ ഇന്ത്യയില്‍ കൃഷി ചെയ്യാന്‍ അനുവാദമുള്ള ജനിതകമാറ്റം വരുത്തിയ ഏക വിള പരുത്തിയാണ്.
ചില ഇന്ത്യന്‍ സ്ഥാപനങ്ങള്‍ 13 വിളകള്‍ക്കായി ജനിതകമാറ്റം വരുത്തിയ വിത്തുകള്‍ വികസിപ്പിക്കുന്നതില്‍ ഏര്‍പ്പെട്ടിരിക്കുകയാണെന്ന് കാര്‍ഷിക ഗവേഷണ വിദ്യാഭ്യാസ വകുപ്പ് സെക്രട്ടറിയും ഐസിഎആര്‍ ഡയറക്ടര്‍ ജനറലുമായ ഹിമാന്‍ഷു പഥക് വ്യക്തമാക്കി. വിളവും ഗുണനിലവാരവും മെച്ചപ്പെടുത്തുന്നതിനായി അരി, ഗോതമ്ബ്, കരിമ്ബ് എന്നിവയും ഇതില്‍ ഉള്‍പ്പെടുന്നു.
