ടോക്കിയോ: യുക്രെയ്ന് യുദ്ധവും ഇന്ധനവില വര്ധനയും കണക്കിലെടുത്ത് ഊര്ജോത്പാദനത്തിനായി അണുശക്തി നിലയങ്ങളെ ആശ്രയിക്കുന്നതിലേക്കു മടങ്ങാന് തീരുമാനിച്ച് ജപ്പാന്.
പുതിയ അണുശക്തി നിലയങ്ങള് നിര്മിക്കുന്നത് പരിഗണിക്കുമെന്നു പ്രധാനമന്ത്രി ഫുമിയോ കിഷിഡ ഊര്ജനയ യോഗത്തില് അറിയിച്ചു. കാര്ബണ്രഹിത രാജ്യമെന്ന ലക്ഷ്യം സഫലമാക്കാന് ഇതേ വഴിയുള്ളൂവെന്നും അദ്ദേഹം കൂട്ടിച്ചേര്ത്തു. 2011ലെ ഫുക്കുഷിമ ആണവദുരന്തത്തിനുശേഷം ജപ്പാന് അണുശക്തി ഉപയോഗിച്ചുള്ള ഊര്ജോത്പാദനം ഒഴിവാക്കിവരുകയായിരുന്നു. 50 റിയാക്ടറുകളില് 46ഉം നിര്ത്തിവച്ചു.
പഴയ അണുശക്തി നിലയങ്ങള് വീണ്ടും തുറക്കുന്നതും അവയുടെ കാലാവധി വര്ധിപ്പിക്കുന്നതും സര്ക്കാര് പരിഗണിക്കുന്നതായി പ്രധാനമന്ത്രി കിഷിഡ പറഞ്ഞു.