ഡല്ഹി: ഇന്ത്യ ആതിഥിയേരാകുന്ന ചെസ് ഒളിംപ്യാഡിന്റെ ദീപശിഖാ പ്രയാണത്തിനു തുടക്കം. ഇന്ദിരാഗാന്ധി ഇന്ഡോര് സ്റ്റേഡിയത്തില് നടന്ന ചടങ്ങില് ഫിഡെ പ്രസിഡന്റ് അര്കാഡി ഡോര്കോവിച്ചില്നിന്നു പ്രധാനമന്ത്രി നരേന്ദ്ര മോദി ഏറ്റുവാങ്ങിയ ദീപശിഖ മുന് ലോക ചെസ് ചാംപ്യന് വിശ്വനാഥന് ആനന്ദിനു കൈമാറി.
രാജ്യത്തെ 75 നഗരങ്ങളിലൂടെ 40 ദിവസം ദീപശിഖാ പ്രയാണം നടക്കും. ചരിത്രത്തിലാദ്യമായി ഇന്ത്യ ആതിഥേയരാകുന്ന ചെസ് ഒളിംപ്യാഡ് രാജ്യത്തിന് അഭിമാനമായി മാറുമെന്നു പ്രധാനമന്ത്രി നരേന്ദ്ര മോദി പറഞ്ഞു. ‘നമ്മുടെ രാജ്യത്തു ജന്മം കൊണ്ട ഒരു കായികരൂപം ഇന്നു ലോകമെങ്ങുമെത്തിയിരിക്കുന്നു. അതിന്റെ തിളക്കം ആഘോഷിക്കാന്, ജന്മനാട് ആതിഥ്യം വഹിക്കാന് തയാറെടുക്കുന്നു. ഇത് ഏറെ അഭിമാനകരമായ നിമിഷമാണ്’ പ്രധാനമന്ത്രി നരേന്ദ്ര മോദി പറഞ്ഞു.
കായികമന്ത്രി അനുരാഗ് ഠാക്കൂര്, ഗ്രാന്ഡ് മാസ്റ്റര് കൊനേരു ഹംപി തുടങ്ങിയവരും ചടങ്ങില് ഭാഗമായി. ലേ, ശ്രീനഗര്, ജയ്പുര്, സൂറത്ത്, മുംബൈ, കൊല്ക്കത്ത, ഹൈദരാബാദ്, ബെംഗളൂരു, പോര്ട്ട് ബ്ലെയര്, കന്യാകുമാരി എന്നിവിടങ്ങളിലും കേരളത്തില് തൃശൂരിലും പ്രയാണമായി എത്തുന്ന ദീപശിഖ ഒളിംപ്യാഡ് വേദിയായ ചെന്നൈ മഹാബലിപുരത്താണു സമാപിക്കുക. ജൂലൈ 28 മുതല് ഓഗസ്റ്റ് 10 വരെയാണ് ചെസ് ഒളിംപ്യാഡ്.