തിരുവനന്തപുരം: ഗവര്‍ണര്‍ ആരിഫ് മുഹമ്മദ് ഖാനെതിരെ എല്‍ഡിഎഫ് രാഷ്ട്രപതിക്ക് പരാതി നല്‍കി. ഭരണഘടനാ തത്വങ്ങള്‍ പാലിക്കാന്‍ ഗവര്‍ണറെ ഉപദേശിക്കണമെന്ന് ബിനോയ് വിശ്വം എംപി രാഷ്ട്രപതിയോട് ആവശ്യപ്പെട്ടു.
സി.പി.എം, എല്‍.ഡി.എഫ് നേതാക്കള്‍ ഗവര്‍ണറെ വിമര്‍ശിക്കുന്നത് തുടരുന്നതിനിടെ ബി.ജെ.പി നേതാക്കള്‍ ഗവര്‍ണര്‍ക്ക് പിന്തുണയുമായി രംഗത്തെത്തി.
ഇന്നലെ ഗവര്‍ണറുടെ വാര്‍ത്താസമ്മേളനത്തിന് ശേഷം അദ്ദേഹത്തിനെതിരെ വിമര്‍ശനം ശക്തമാക്കിയ എല്‍.ഡി.എഫ് നേതാക്കള്‍ രണ്ടാം ദിവസവും അത് തുടരുകയാണ്. ഗവര്‍ണര്‍ക്കെതിരായ എല്ലാ സാധ്യതകളും തേടുന്നതിന്‍റെ ഭാഗമായാണ് ബിനോയ് വിശ്വം രാഷ്ട്രപതിയുടെ ഇടപെടല്‍ തേടുന്നത്. ഭരണഘടനാ തത്വങ്ങള്‍ പാലിക്കാന്‍ ഗവര്‍ണറെ ഉപദേശിക്കണമെന്ന് ആവശ്യപ്പെട്ട് ബിനോയ് വിശ്വം രാഷ്ട്രപതിക്ക് കത്തയച്ചു.
അസാധാരണ പത്രസമ്മേളനം വിളിച്ച്‌ മുഖ്യമന്ത്രിയെയും സര്‍ക്കാരിനെയും പാര്‍ട്ടിയെയും വിമര്‍ശിച്ച ഗവര്‍ണര്‍ ആരിഫ് മുഹമ്മദ് ഖാനെതിരെ രൂക്ഷ വിമര്‍ശനവുമായി സിപിഎം സംസ്ഥാന സെക്രട്ടറി എം വി ഗോവിന്ദനും രംഗത്തെത്തി. ആര്‍.എസ്.എസിന്‍റെ സ്വയംസേവകനായി പ്രവര്‍ത്തിക്കാതെ ഗവര്‍ണര്‍ ഗവര്‍ണറായി പ്രവര്‍ത്തിക്കണമെന്ന് എം.വി ഗോവിന്ദന്‍ വിമര്‍ശിച്ചു. ഗവര്‍ണര്‍ കോണ്‍ഗ്രസിന്‍റെയും ബിജെപിയുടെയും പ്രതിനിധിയായി പ്രവര്‍ത്തിക്കരുതെന്നും ഭരണഘടനാപരമായ കാര്യങ്ങള്‍ നടപ്പാക്കണമെന്നും ഗോവിന്ദന്‍ പറഞ്ഞു. ഗവര്‍ണറെ ഉപയോഗിച്ച്‌ ആര്‍എസ്‌എസ് ഭരണഘടനാ പ്രതിസന്ധി സൃഷ്ടിക്കുകയാണെന്ന് മന്ത്രി എം ബി രാജേഷ് ആരോപിച്ചു. ആരിഫ് മുഹമ്മദ് ഖാന്‍റെ നടപടികള്‍ വലിയ ഭരണഘടനാ പ്രശ്നം സൃഷ്ടിക്കുമെന്നും അദ്ദേഹം കൂട്ടിച്ചേര്‍ത്തു.
