ന്യൂഡല്‍ഹി: കോണ്‍ഗ്രസിന്‍റെ പ്രസിഡന്റ് തിരഞ്ഞെടുപ്പില്‍ വോട്ടര്‍പട്ടികയുടെ സുതാര്യതയെച്ചൊല്ലി തര്‍ക്കം.
തിരഞ്ഞെടുപ്പ് പ്രക്രിയയിലെ സുതാര്യത കോണ്‍ഗ്രസ് പ്രസിഡന്റ് സ്ഥാനത്തേക്കുള്ള മത്സരത്തിന് മുന്നോടിയായി വിവാദ വിഷയമായി മാറിയിരിക്കുകയാണ്. ആനന്ദ് ശര്‍മ്മ, ശശി തരൂര്‍, മനീഷ് തിവാരി, പൃഥ്വിരാജ് ചവാന്‍, കാര്‍ത്തി ചിദംബരം എന്നിവരുള്‍പ്പെടെയുള്ള നേതാക്കള്‍ വോട്ടര്‍പട്ടിക പരസ്യപ്പെടുത്തണമെന്നും തിരഞ്ഞെടുപ്പ് പ്രക്രിയയില്‍ സുതാര്യത ഉറപ്പാക്കണമെന്നും ആവശ്യപ്പെട്ടു.
ദേശീയ തലത്തില്‍ 9,000 ത്തോളം പ്രതിനിധികളുടെ വോട്ടര്‍ പട്ടിക തയ്യാറാക്കിയിട്ടുണ്ടെന്നാണ് എ.ഐ.സി.സിയുടെ അവകാശവാദം. എന്നാല്‍ കോണ്‍ഗ്രസിലെ ഒരു വിഭാഗം ഇതിനെതിരെ രംഗത്തെത്തി. പട്ടിക തയ്യാറാക്കിയ രീതിയെയും അത് പരസ്യമാക്കാന്‍ നേതൃത്വത്തിന്‍റെ വിമുഖതയെയും അവര്‍ ചോദ്യം ചെയ്യുകയാണ്.
