കൊല്ലം: കൊട്ടിയത്ത് 14കാരനെ തട്ടിക്കൊണ്ടുപോയ സംഭവത്തില്‍ കൂടുതല്‍ വിവരങ്ങള്‍ പുറത്ത്.
സാമ്ബത്തിക ഇടപാടിനെ ചൊല്ലിയുള്ള തര്‍ക്കത്തെ തുടര്‍ന്ന് ബി ഫാം വിദ്യാര്‍ഥിയുടെ നിര്‍ദേശപ്രകാരമാണ് കുട്ടിയെ തട്ടിക്കൊണ്ടുപോയത്.
കുട്ടിയുടെ കുടുംബം ബന്ധുവില്‍ നിന്നും 10 ലക്ഷം രൂപ കടം വാങ്ങിയിരുന്നു. പണം തിരികെ വാങ്ങിയെടുക്കാന്‍ ബന്ധുവിന്‍റെ മകനാണ് ക്വട്ടേഷന്‍ നല്‍കിയത്. കുട്ടിയെ മാര്‍ത്താണ്ഡത്ത് എത്തിക്കുകയായിരുന്നു ലക്ഷ്യം. ഒരു ലക്ഷം രൂപയ്ക്കാണ് ക്വട്ടേഷന്‍ നല്‍കിയത്.
തമിഴ്നാട് സ്വദേശികള്‍ ഉള്‍പ്പടെ ഒന്‍പത് പേരടങ്ങിയ സംഘമാണ് വീട്ടില്‍ അതിക്രമിച്ച്‌ കയറി കുട്ടിയെ തട്ടിക്കൊണ്ടുപോയത്. രണ്ടുദിവസത്തെ നിരീക്ഷണത്തിന് ശേഷമാണ് കുട്ടിയെ സംഘം കടന്നത്.
മാതാപിതാക്കളില്ലാത്ത സമയത്ത് വീട്ടിലെത്തിയ സംഘം സഹോദരിയെയും അയല്‍വാസിയെയും അടിച്ചു വീഴ്ത്തിയാണ് 14കാരനായ കുട്ടിയുമായി കടന്നത്.
കണ്ണനല്ലൂര്‍ സ്വദേശി ആസാദിന്‍റെ മകന്‍ ആഷിക്കിനെയാണ് തമിഴ്നാട് സ്വദേശികളടക്കം അടങ്ങുന്ന സംഘം തട്ടിക്കൊണ്ടുപോയത്. ചൊവ്വാഴ്ച വൈകിട്ട് ആറരയോടെ ആസാദും ഭാര്യ ഷീജയും വീട്ടില്‍ ഇല്ലാതിരുന്ന സമയം രണ്ട് കാറുകളിലായാണ് സംഘമെത്തിയത്.
സംഭവത്തെക്കുറിച്ച്‌ അറിഞ്ഞയുടന്‍ സംസ്ഥാനത്തെ എല്ലാ പൊലീസ് സ്റ്റേഷനുകളിലേക്കും തമിഴ്നാട് രജിസ്ട്രേഷനുള്ള കാറില്‍ കുട്ടിയെ കടത്തുന്നതായി സന്ദേശം കൈമാറിയിരുന്നു. തുടര്‍ന്ന് അഞ്ച് മണിക്കൂറിന് ശേഷം പാറശാലയില്‍ വച്ചാണ് സംഘത്തെ തടഞ്ഞ് അബോധാവസ്ഥയിലായിരുന്ന കുട്ടിയെ മോചിപ്പിച്ചത്.
പാറശാല കോഴിവിളക്കു സമീപം വച്ചാണ് ഓട്ടോ തടഞ്ഞ് കുട്ടിയെ പോലീസ് രക്ഷിച്ചത്. തട്ടിക്കൊണ്ടുപോകല്‍ സംഘത്തിലെ ഒരാളെ അറസ്റ്റ് ചെയ്തു. മാര്‍ത്താണ്ടം സ്വദേശി ബിജു (30) വിനെയാണ് പിടികൂടിയത്.
