പാലക്കാട്: ഷൊര്ണൂരില് കൃഷിയിടത്തിലേക്കു വെള്ളം തിരിക്കുന്നതിനെ ചൊല്ലിയുണ്ടായ തര്ക്കത്തിനിടെ യുവാവ് മര്ദനമേറ്റു മരിച്ച സംഭവത്തില് ആറു പേര് അറസ്റ്റില്.
തിരുമിറ്റക്കോട് സ്വദേശി പ്രശാന്ത് കൊല്ലപ്പെട്ട കേസിലാണ് കോഴിപ്പാറ കാരമണ്ണ ശശീന്ദ്രന്, ബന്ധുക്കളായ വേണുഗോപാലന്, ഉണ്ണിക്കൃഷ്ണന്, വിപിന്, അനില്കുമാര്, പ്രിന്സ് എന്നിവരെ ഷൊര്ണൂര് പോലീസ് അറസ്റ്റ് ചെയ്തത്. മര്ദനമാണ് മരണത്തിന് കാരണമായതെന്നാണ് പോസ്റ്റുമോര്ട്ടം റിപ്പോര്ട്ടിലെ സൂചന. തിങ്കളാഴ്ച രാവിലെ പ്രശാന്ത് കോഴിപ്പാറയിലെ കൃഷിസ്ഥലത്തേക്ക് ബൈക്കില് വരുമ്ബോള് ശശീന്ദ്രനും ബന്ധുക്കളായ 5 പേരും ചേര്ന്ന് തടഞ്ഞ് നിര്ത്തി മര്ദിച്ചെന്നാണു കേസ്. പ്രശാന്തിന്റെ കുടുംബവീട്ടിലെ കൃഷിസ്ഥലമാണു കോഴിപ്പാറയിലേത്.
പ്രശാന്തിനെ സംഘം ചേര്ന്ന് മര്ദിച്ചതിന് പിന്നാലെ ആറുപേരും രക്ഷപ്പെട്ടു. അവശനിലയിലായി കുഴഞ്ഞു വീണ യുവാവിനെ നാട്ടുകാര് തൃശൂര് മെഡിക്കല് കോളജ് ആശുപത്രിയില് എത്തിച്ചെങ്കിലും ഉച്ചകഴിഞ്ഞു രണ്ടരയോടെ മരിച്ചു. ആക്രമണമുണ്ടാകുന്നതിന് ദിവസങ്ങള്ക്ക് മുന്പും ശശീന്ദ്രനും പ്രശാന്തുമായി വെള്ളം തിരിക്കുന്നതിനെച്ചൊല്ലി തര്ക്കമുണ്ടായിരുന്നതായും പൊലീസ് പറയുന്നു.