ബംഗലൂരു: കോണ്ഗ്രസ് നേതാവ് രാഹുല് ഗാന്ധി നയിക്കുന്ന ഭാരത് ജോഡോ യാത്ര ഇപ്പോള് കര്ണാടകയില് പ്രയാണം തുടരുകയാണ്.
അതേസമയം കേരളത്തിലേത് പോലെ ഭാരത് ജോഡോ യാത്രയിലെ സവര്ക്കര് ഫ്ലെക്സ് കര്ണാടകയിലും വിവാദമായി മാറിയിട്ടുണ്ട്. കഴിഞ്ഞ ദിവസം ഭാരത് ജോഡോ യാത്രയ്ക്ക് അഭിവാദ്യം അര്പ്പിച്ച സവര്ക്കറുടെ ഫോട്ടോയുള്ള ഫ്ലെക്സ് സോഷ്യല് മീഡിയയില് വൈറലായിരുന്നു.
കഴിഞ്ഞ ദിവസം മുതല് കോണ്ഗ്രസിന്റെ രാഷ്ട്രീയ എതിരാളികള് ഫ്ലെക്സിന്റെ ചിത്രം സോഷ്യല് മീഡിയയില് വ്യാപകമായി പ്രചരിപ്പിച്ചിരുന്നു. കോണ്ഗ്രസ് എംഎല്എ എന് എ ഹാരീസിന്റെ പേരിലുള്ള ഫ്ലെക്സില് മുന് കര്ണാടക മുഖ്യമന്ത്രി സിദ്ധരാമയ്യയുടെയും കോണ്ഗ്രസ് കര്ണാടക അധ്യക്ഷന് ഡി കെ ശിവകുമാറിന്റെയും ചിത്രങ്ങളുണ്ട്. രാഹുല് നടക്കുന്നതിന്റെ ചിത്രവും ഉണ്ട്.
എന്നാല്, അത്തരമൊരു ചിത്രം പാര്ട്ടി വച്ചിട്ടില്ലെന്ന് കര്ണാടക കോണ്ഗ്രസ് വൃത്തങ്ങള് പറഞ്ഞു. ഭാരത് ജോഡോ യാത്രയുടെ വിജയം കുറയ്ക്കാന് ചില വര്ഗീയ കക്ഷികള് സ്ഥാപിച്ച വ്യാജ ഫ്ലെക്സാണിതെന്ന് കോണ്ഗ്രസ് വൃത്തങ്ങള് പറയുന്നു. ഇത്തരം പ്രചാരണങ്ങള്ക്കെതിരെ നിയമനടപടി അടക്കം ആലോചിക്കുന്നുണ്ടെന്നും കോണ്ഗ്രസ് വൃത്തങ്ങള് പറഞ്ഞു.