ലണ്ടന്‍: ബ്രിട്ടീഷ് ആഭ്യന്തര മന്ത്രിയും ഇന്ത്യന്‍ വംശജയുമായ സുവെല്ല ബ്രേവര്‍മാന്‍ രാജിവെച്ചു. സ്വന്തം ഇമെയിലില്‍ നിന്ന് ഔദ്യോഗിക രേഖ അയച്ചതിനെ തുടര്‍ന്നാണ് രാജി.
ബിബിസി റിപ്പോര്‍ട്ട് അനുസരിച്ച്‌, സര്‍ക്കാര്‍ രേഖ സ്വീകരിക്കാന്‍ അര്‍ഹതയുള്ള ഒരാള്‍ക്കല്ല അയച്ചത്. അതേസമയം, രേഖ രാജ്യസുരക്ഷയെ ബാധിക്കുന്നതായിരുന്നില്ല.
തെറ്റിന്‍റെ ഉത്തരവാദിത്തം ഏറ്റെടുത്ത് രാജിവയ്ക്കുകയാണെന്ന് ബ്രേവര്‍മാന്‍ പ്രധാനമന്ത്രി ലിസ് ട്രസിന് അയച്ച കത്തില്‍ പറഞ്ഞു. അതേസമയം, കഴിഞ്ഞ തിരഞ്ഞെടുപ്പില്‍ ജനങ്ങള്‍ക്ക് നല്‍കിയ വാഗ്ദാനങ്ങള്‍ നടപ്പാക്കുന്നതില്‍ ഗുരുതരമായ ആശങ്കയുണ്ടെന്ന് ബ്രേവര്‍മാന്‍ പറഞ്ഞു.
ബ്രേവര്‍മാന്‍റെ അച്ഛന്‍ ഗോവ സ്വദേശിയാണ്. അമ്മ തമിഴ് വംശജയും. 43 ദിവസങ്ങള്‍ക്കു മുന്‍പാണ് സുവെല്ല ബ്രേവര്‍മാനെ ആഭ്യന്തരമന്ത്രിയായി നിയമിച്ചത്. നേരത്തെ, ഋഷി സുനക്കിനൊപ്പം പ്രധാനമന്ത്രി സ്ഥാനത്തേക്ക് മത്സരിച്ചവരില്‍ ബ്രേവര്‍മാനും ഉണ്ടായിരുന്നു.
