മുന്‍ ഇന്ത്യന്‍ സ്ട്രൈക്കറായ റോബിന്‍ സിങ് ഇനി ബെംഗളൂരു ഡിവിഷനില്‍ കളിക്കും. ബെംഗളൂരുവിലെ പുതിയ ക്ലബായ സ്പോര്‍ടിങ് ക്ലബ് ബെംഗളൂരു ആണ് റോബിന്‍ സിംഗിനെ സൈന്‍ ചെയ്തിരിക്കുന്നത്.
ബെംഗളൂരു ഡിവിഷനിലാണ് ഇപ്പോള്‍ കളിക്കുന്നത് എങ്കിലും സമീപ ഭാവിയില്‍ തന്നെ ഐ എസ് എല്ലില്‍ എത്താന്‍ ആഗ്രഹിക്കിന്ന ക്ലബാണ് സ്പോര്‍ടിങ് ക്ലബ് ബെംഗളൂരു. കഴിഞ്ഞ സീസണില്‍ പഞ്ചാബ് എഫ് സിയില്‍ ആയിരുന്നു റോബിന്‍ കളിച്ചിരുന്നത്‌.
അതിനു മുമ്ബ് ഹൈദരബാദില്‍ ആയിരിക്കെ ലോണില്‍ റിയല്‍ കാശ്മീരിലും കളിച്ചിരുന്നു. മൂന്ന് സീസണുകളോളം ഐ എസ് എല്ലില്‍ ഹൈദരബാദ്/പൂനെ സിറ്റി ടീമുകളുടെ ഭാഗമായിരുന്നു റോബിന്‍ സിംഗ്. എന്നാല്‍ അവിടെ കാര്യമായി തിളങ്ങാന്‍ റോബിന്‍ സിംഗിനായിരുന്നില്ല. അതു മുതല്‍ താരത്തിന്റെ കരിയര്‍ താഴോട്ടാണ് സഞ്ചരിക്കുന്നത്. മുമ്ബ് എഫ് സി ഗോവയ്ക്കായും ഡെല്‍ഹി ഡൈനാമോസിനായും എ ടി കെ കൊല്‍ക്കത്തയ്ക്കായും ഐ എസ് എല്ലില്‍ റോബിന്‍ സിങ് കളിച്ചിട്ടുണ്ട്. മുന്‍ ഈസ്റ്റ് ബംഗാള്‍ താരം കൂടിയാണ്. ഇന്ത്യക്കായി 30 മത്സരങ്ങള്‍ കളിച്ചിട്ടുള്ള റോബിന്‍ 5 ഗോളുകള്‍ രാജ്യത്തിനായി നേടിയിട്ടുണ്ട്.,
