കൊച്ചി: എല്‍ദോസ് കുന്നപ്പിള്ളില്‍ എംഎല്‍എയ്‌ക്കെതിരെ പാര്‍ട്ടി നടപടി ഇന്നുണ്ടാകുമെന്ന് പ്രതിപക്ഷനേതാവ് വി.ഡി സതീശന്‍.
പരാതിക്കാരിയുടെ സ്വാതന്ത്ര്യത്തിന് മേല്‍ കൈകടത്തില്ലെന്നും മറ്റൊരു ഇടപെടലും നടത്തില്ലെന്നും വി.ഡി സതീശന്‍ കൂട്ടിച്ചേര്‍ത്തു.
‘പരാതിക്കാരിയുടെ സ്വാതന്ത്ര്യത്തിന് മേല്‍ കൈകടത്തില്ല. എത്ര പരാതി വേണമെങ്കിലും അവര്‍ക്ക് കൊടുക്കാം. പാര്‍ട്ടിയില്‍ നിന്നാരും ഇതുവരെ അവരെക്കുറിച്ച്‌ ഒന്നും പറഞ്ഞിട്ടില്ല. കൊലക്കുറ്റം വരെ ആരോപിച്ചിട്ടും മുന്‍കൂര്‍ ജാമ്യം വരെ കൊടുത്തതും മറ്റുമൊക്കെ പരിശോധിച്ച ശേഷം പാര്‍ട്ടി ഇന്ന് തന്നെ ഒരു തീരുമാനമെടുക്കും. എന്നാല്‍ ആ തീരുമാനമെന്തെന്ന് ഇപ്പോള്‍ പറയാനാവില്ല. അത് കെപിസിസി പ്രസിഡന്റ് ഔദ്യോഗികമായി അറിയിച്ച്‌ കൊള്ളും’. വി.ഡി സതീശന്‍ പറഞ്ഞു.
ബലാത്സംഗക്കേസില്‍ പ്രതി ചേര്‍ത്തതിനെ തുടര്‍ന്ന് ഒളിവിലായിരുന്ന എല്‍ദോസ് കുന്നപ്പിള്ളില്‍ ഇന്ന് രാവിലെയാണ് വീട്ടില്‍ തിരിച്ചെത്തിയത്. ഒളിവില്‍ പോയതല്ലെന്നും പൊതുയിടങ്ങളില്‍ നിന്നൊഴിഞ്ഞ് നില്‍ക്കുകയായിരുന്നുവെന്നുമാണ് എംഎല്‍എയുടെ പ്രതികരണം.
