കൊല്‍ക്കത്ത: അനധികൃതമായി സ്വത്ത് സമ്ബാദിച്ചെന്ന് തെളിഞ്ഞാല്‍ എല്ലാം ബുള്‍ഡോസര്‍കൊണ്ട് ഇടിച്ച്‌ നിരത്താമെന്ന് പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി.
സ്വയം അന്വേഷണ വിധേയയാവുകയാണെന്ന് പ്രഖ്യാപിച്ച്‌ കൊണ്ടു സംസാരിക്കുന്നതിനിടെയായിരുന്നു മമതയുടെ പരാമര്‍ശം. തനിക്കെതിരെ അന്വേഷണം നടത്താന്‍ മമത ചീഫ് സെക്രട്ടറയ്‌ക്കും സര്‍ക്കാര്‍ ഉദ്യോഗസ്ഥര്‍ക്കും നിര്‍ദ്ദേശം നല്‍കി.
താന്‍ ഒരു തരി മണ്ണ് പോലും അനധികൃതമായി സ്വന്തമാക്കിയിട്ടില്ല. അനധികൃത സ്വത്തുക്കള്‍ കൈക്കലാക്കിയെന്ന് തെളിഞ്ഞാല്‍ നിങ്ങള്‍ക്ക് അതെല്ലാം ബുള്‍ഡോസര്‍ ഉപയോഗിച്ച്‌ തകര്‍ക്കാം. അതിന് നിങ്ങള്‍ക്ക് ആരുടെയും അനുമതിയ്‌ക്കായി കാത്ത് നില്‍ക്കേണ്ട ആവശ്യമില്ലെന്നും മമത ഉദ്യോഗസ്ഥരോട് പറഞ്ഞു.
കല്‍ക്കരിക്കടത്ത് അഴിമതി കേസില്‍ അനന്തരവനും തൃണമൂല്‍ കോണ്‍ഗ്രസ് നേതാവുമായ അഭിഷേക് ബാനര്‍ജി പ്രതിയാണ്. സംഭവത്തില്‍ മമതാ ബാനര്‍ജിയ്‌ക്കും പങ്കുണ്ടെന്നാണ് ഉയരുന്ന ആരോപണം. ഇതില്‍ മുഖ്യമന്ത്രിയ്‌ക്കും തൃണമൂല്‍ കോണ്‍ഗ്രസിനുമെതിരെ രൂക്ഷമായ ജനരോഷം ആണ് ഉയര്‍ന്നുവരുന്നത്. ഇത് തണുപ്പിക്കുന്നതിന് വേണ്ടിയാണ് മമത സ്വയം അന്വേഷണത്തിന് വിധേയയാകുന്നത്.
അതേസമയം കേസില്‍ അഭിഷേക് ബാനര്‍ജിയെ ചോദ്യം ചെയ്യാന്‍ വിളിപ്പിച്ചുകൊണ്ട് എന്‍ഫോഴ്‌സ്‌മെന്റ് വീണ്ടും നോട്ടീസ് നല്‍കിയിട്ടുണ്ട്. വെള്ളിയാഴ്ച ഹാജരാകാനാണ് നിര്‍ദ്ദേശം.
