ന്യൂഡല്ഹി
ഇലക്ടറല് ബോണ്ട് വില്പ്പനയ്ക്ക് 15 ദിവസംകൂടി അധികം അനുവദിച്ച കേന്ദ്ര സര്ക്കാര് നടപടി ധന, നിയമ മന്ത്രാലയങ്ങളുടെ എതിര്പ്പ് അവഗണിച്ചെന്ന് സുപ്രീംകോടതിയില് സത്യവാങ്മൂലം.
മന്ത്രാലയങ്ങളിലെ ചില പ്രധാന ഉദ്യോഗസ്ഥര് നീക്കത്തെ എതിര്ത്തിരുന്നതായി ഇലക്ടറല് ബോണ്ടിനെതിരെ സുപ്രീംകോടതിയെ സമീപിച്ച അസോസിയേഷന് ഫോര് ഡെമോക്രാറ്റിക് റിഫോംസ് (എഡിആര്) അധിക സത്യവാങ്മൂലത്തില് ആരോപിച്ചു.
ചില സംസ്ഥാനങ്ങളിലെ നിയമസഭാ തെരഞ്ഞെടുപ്പുകള്ക്ക് മുമ്ബ് സുതാര്യത ഇല്ലാത്ത രീതിയില് അധിക ധനം സമാഹരിക്കുകയെന്ന ലക്ഷ്യത്തോടെയാണ് അധികസമയം അനുവദിച്ചതെന്ന് ഹര്ജിക്കാര് ചൂണ്ടിക്കാണിച്ചു. നവംബര് ഏഴിനാണ് ഇലക്ടറല്ബോണ്ട് വില്പ്പനയ്ക്ക് 15 ദിവസം കൂടി അനുവദിച്ച് ധനമന്ത്രാലയം വിജ്ഞാപനം പുറപ്പെടുവിച്ചത്. സുപ്രീംകോടതിയുടെ പരിഗണനയിലുള്ള വിഷയമായതിനാല് കൂടുതല് സമയം അനുവദിക്കുന്നത് ശരിയല്ലെന്ന് ചില മുതിര്ന്ന ഉദ്യോഗസ്ഥര് മുന്നറിയിപ്പു നല്കിയതായി വിവരാവകാശ നിയമപ്രകാരം ലഭിച്ച മറുപടികളില് വ്യക്തമാണ്.