ഇരുപതാം പിറന്നാളിന്റെ നിറവില്‍ പ്രമുഖ സോഷ്യല്‍ മീഡിയ പ്ലാറ്റ്ഫോമായ ഫേസ്ബുക്ക്. 2004-ലാണ് മാർക്ക് സക്കർബർഗ് ഫേസ്ബുക്കിന് തുടക്കമിടുന്നത്.
20 വർഷങ്ങള്‍ക്ക് ശേഷം ആഗോള സാങ്കേതികവിദ്യാ ഭീമന്മാരില്‍ മുൻനിരയിലുള്ള സ്ഥാപനവും, അതിശക്തമായ സോഷ്യല്‍ മീഡിയ കമ്ബനി കൂടിയുമാണ് ഫേസ്ബുക്ക്. ഇപ്പോഴിതാ കഴിഞ്ഞ 20 വർഷക്കാലയളവില്‍ ഫേസ്ബുക്കിലെ ഓർമ്മകളെ കുറിച്ച്‌ പങ്കുവെച്ചിരിക്കുകയാണ് സക്കർബർഗ്.
സക്കർബർഗ് തന്റെ ഔദ്യോഗിക ഫേസ്ബുക്ക് പേജില്‍ 2004-ലെ പ്രൊഫൈല്‍ ചിത്രം പങ്കുവെച്ചിട്ടുണ്ട്. ഫേസ്ബുക്ക് അവതരിപ്പിച്ച്‌ ഒരു വർഷത്തിനുള്ളില്‍ ഏകദേശം 10 ലക്ഷത്തിലധികം ഉപഭോക്താക്കളെയാണ് നേടാൻ സാധിച്ചത്. അക്കാലത്ത് തരംഗമായിരുന്ന മൈസ്പേസിനെ പോലും മറികടക്കാൻ ഫേസ്ബുക്കിന് സാധിച്ചിട്ടുണ്ട്. 2012-ല്‍ ഫേസ്ബുക്കിന്റെ പ്രതിമാസ ഉപഭോക്താക്കളുടെ എണ്ണം 100 കോടിയായാണ് ഉയർന്നത്. 2023ന്റെ അവസാനം എത്തുമ്ബോഴേക്കും 211 കോടി ഉപഭോക്താക്കളുമായി ഫേസ്ബുക്ക് മുൻനിരയില്‍ തന്നെയുണ്ട്.
