അയര്ലന്ഡിനെതിരെയുള്ള ഒന്നാം ട്വന്റി20 മത്സരത്തില് ഇന്ത്യയ്ക്ക് 7 വിക്കറ്റിന് ജയം. മഴ മൂലം 12 ഓവറാക്കി ചുരുക്കിയിരുന്നു. സ്കോര്: അയര്ലന്ഡ് 12 ഓവറില് 4 വിക്കറ്റിന് 108. ഇന്ത്യ 9.2 ഓവറില് 3ന് 111. 29 പന്തില് 47 റണ്സെടുത്തു പുറത്താകാതെ നിന്ന ദീപക് ഹൂഡയാണ് ഇന്ത്യയുടെ ടോപ് സ്കോറര്.
ക്യാപ്റ്റന് ഹാര്ദിക് പാണ്ഡ്യ (12 പന്തില് 24), ഓപ്പണര് ഇഷാന് കിഷന് (11 പന്തില് 26) എന്നിവരും ഇന്ത്യന് ഇന്നിങ്സില് തിളങ്ങി. 3 ഓവറില് 11 റണ്സ് മാത്രം വഴങ്ങി ഒരു വിക്കറ്റെടുത്ത യുസ്വേന്ദ്ര ചെഹലാണ് പ്ലെയര് ഓഫ് ദ് മാച്ച്.
പേസ് ബോളര് ഉമ്രാന് മാലിക്കിന് ഇന്ത്യ അരങ്ങേറ്റ അവസരം നല്കി. മലയാളി താരം സഞ്ജു സാംസണ് പ്ലേയിങ് ഇലവനില് ഇടം പിടിച്ചില്ല. പരമ്പരയിലെ അവസാന മത്സരം നാളെ. ടോസ് നേടിയ ഇന്ത്യ ബോളിങ് തിരഞ്ഞെടുത്തു.മഴ മൂലം കളി 12 ഓവറാക്കി ചുരുക്കുകയായിരുന്നു.
ആദ്യ ഓവറില് തന്നെ ഐറിഷ് ക്യാപ്റ്റന് ആന്ഡ്ര്യൂ ബാല്ബിര്ണിയെ (0) പുറത്താക്കി ഭുവനേശ്വര് കുമാര് ഇന്ത്യയ്ക്കു മികച്ച തുടക്കം നല്കി. അടുത്ത ഓവറില് സഹഓപ്പണര് പോള് സ്റ്റെര്ലിങ്ങിനെ (4) ഹാര്ദിക് പാണ്ഡ്യയും പുറത്താക്കി. എന്നാല് അര്ധ സെഞ്ചറിയുമായി ഒരറ്റത്ത് ഉറച്ചു നിന്ന ഹാരി ടെക്റ്റര് (33 പന്തില് 64) ആതിഥേയരെ നൂറു കടത്തി. ഇന്ത്യയ്ക്കു വേണ്ടി ഭുവനേശ്വര്, ഹാര്ദിക്, ആവേശ് ഖാന്, ചെഹല് എന്നിവര് ഓരോ വിക്കറ്റ് വീതം നേടി.